[Harefo]

Ny fadin-drazana ho an’ny Andriana dia misy hifandraisany foana amin’ny hasina. Ireo telo ireo no mifady hena ratsy dia satria avy amin’izy ireo no nipoiran’ny andria-manjaka. Ary ny andriana no manjaka dia ny hasina izay homen’ny vahoaka azy mazava loatra nefa ihany koa ilay raisiny avy amin’Andriamanitra Andriananahary sy ny Razana. Ny Zanakandriana sy ny Zazamarolahy ary ny Andriamasinavalona no voakasik’ireo satria tao no nipoiran’ny Andriamanjaka. Tsy ny Andriamasinavalona rehetra koa no manaraka io fomba io satria misy karazany ny Andriamasinavalona. tany ampiandohana dia ny « zana-behivavy » no tena mizaka ny satan’Andriamasinavalona. Singanina manoka amin’ireny ny teraky Rampanambonintany anabaviny, Andriamasinavalona mpanjaka io.
Misy koa ireo izay nomena izany sata izany noho ny fifandraisany manokana tamin’ny Andria-manjaka, indrindra tamin’Andriamasinavalona sy Andrianampoinimerina. Ohatra akaiky amin’izany Andriamahazonoro Antemoro Anakara nantsoina hamboatra ny vitan-dRadama rainy. Nomen’Andrianampoinimerina ny satan’Andriamasinavalona izy sy ny taranany tavela teto Imerina. Tsy voatery hanaraka ny fadin-drazan’ny andriamanjaka sy ny tera-behivavy izany izy ireo.
Ankehitriny dia tsy misy intsony ny fanjakana ifandimbiasana ka nahavery hasina ny fifadiana. Manamafy izany koa ny fivavahana kristiana ka izany nahatonga izay nifady taloha hihinana. Safidy manokana io ka tsisy bedy…
Tsara ny manamarika fa ny Andriana rehetra no nanana io fady io tany ampiandohana. Tafiditra tao anatin’izany ny Antehiroka. fa rehefa nandroso ny fotoana dia niha-nalalaka ny fomba ho an’ireo « lignée » lavitra kokoa ny Andriamanjaka. ny fametrahana ny satan’ny Zazamarolahy sy ny Andriamasinavalona tamin’ny andron’Andriamasinavalona izay niampy ny Zanakandriana tamin’Andrianampoinimerina dia nanamafy izany.
Mikasika ny » fihinanan’olona » indray dia mbola maro ny fomba fahagola tsy fantatry ny sarababem-bahoaka izay mihonona amin’ny lovantsofim-pianakaviana fotsiny. Ny lovantsofina nefa dia mifidifidy tantaraina araka ilay voalaza hoe « la mémoire est sélective ». Noho izany dia ny tsara sy izay azon’ny taranaka ireharehana ihany no tena ampitaina. Adino ho azy noho izany ny fomba amam-panao ka tsy ahafantarana ny tena anton-javatra. izany no maha-zava-dehibe ny fikarohana amin’ireo boky tranainy mahakasika an’i madagasikara rehetra. izany ihany koa no antony nanomezana « référence bibliographique » etsy ambony.

[Auteur]

Posts